Pook ng Lazareto de Mariveles*

POOK NG LAZARETO DE MARIVELES

ITINAYO SA BUNGAD NG LOOK NG MAYNILA UPANG PIGILAN ANG PAGLAGANAP NG KOLERA SA MAYNILA, 1882. ISINAAYOS AT NAGTAYO NANG HIGIT NA MATITIBAY NA GUSALING YARI SA KAHOY AT YERO AYON SA DISENYO NI INHENYERO JUAN FERNÁNDEZ SHAW, 1886. NILISAN NG MGA ESPANYOL, 1898; AT KALAUNA’Y INOKUPA NG HUKBONG REBOLUSYONARYO HANGGANG SA PAGDATING NG MGA AMERIKANO, 1900. PINANGASIWAAN NG MARINE HOSPITAL SERVICE NG ESTADOS UNIDOS SA PAMUMUNO NI DOKTOR J.C. PERRY, 4 ENERO 1900. ISINAAYOS SA PAMAMAGITAN NG MAKABAGONG TEKNOLOHIYA; NAGPATAYO NG MGA PANIBAGONG PASILIDAD TULAD NG OSPITAL, MGA KWARTO, PANTALAN, MGA BAHAY-PALIGUAN AT MGA SILID-DETENSYON; AT BINUKSAN BILANG MARIVELES QUARANTINE STATION, 26 SETYEMBRE 1901. ITINAYO ANG DALAWANG PALAPAG NA KONKRETONG GUSALI NA MAY ISTILONG NEO-KLASIKAL AYON SA DISENYO NI ARKITEKTO ANTONIO TOLEDO, NOBYEMBRE 1941. NAWASAK NOONG IKALAWANG DIGMAANG PANDAIGDIG, 1945. KINUMPUNI SA BISA NG PHILIPPINE REHABILITATION ACT OF 1946. DITO ITINATAG ANG NATIONAL MENTAL HOSPITAL EXTENSION SERVICE NANG IPINAGKALOOB NG KAGAWARAN NG KUWARENTENAS ANG PAMAMAHALA SA ILANG EKTARYANG LUPAIN SA ADMINISTRASYON NITO, 1955. PINANGALANANG MARIVELES MENTAL WELLNESS AND GENERAL HOSPITAL, 2019. IPINAHAYAG NA PAMBANSANG PALATANDAANG PANGKASAYSAYAN, 2023.